Lakip ang pila ka mga Pinoy sa 157 ka mga tawo nga gin-evacuate halin sa Sudan sa tunga sang away sang Sudanese forces kag paramilitary groups.
Suno sa Saudi Arabian Ministry of Foreign Affairs, ang evacuation ang ginpatigayon sang Royal Saudi Naval Forces.
Lakip sa mga ginpang-evacuate amo ang 91 ka Saudi citizens kag 66 nationals halin sa 12 ka mga pungsod lakip na ang Kuwait, Qatar, United Arab Emirates, Egypt, Tunisia, Pakistan, India, Bulgaria, Bangladesh, Canada, Burkina Faso, kag Pilipinas.
Una na nga ginpahayag ni President Ferdinand Marcos Jr. nga naga-preparar ang gobyerno nga ma-repatriate ang nabilin nga mga Pinoy sa Sudan apisar nga wala naga-operate ang mga airports halin sang nagsugod ang inaway sang Abril 15.
Kun basehan ang latest data halin sa Philippine Embassy sa Cairo, may ginabanta 400 ka Filipinos sa Sudan samtang suno naman sa Department of Foreign Affairs, 86 na ka mga Pinoy ang nag-request sang repatriation.
Masobra naman sa 400 ang nagkalamatay kag masobra 3,000 ang nasamaran bangud sa amo nga ginamo.
Mangin ang pwersa-militar sang Estados Unidos sang Amerika kag sang United Kingdom ang naghulag na kag gin-evacuate ang embassy staff halin sa amo nga pungsod.
Samtang, sa tradisyonal nga pangamuyo sa Saint Peter’s Square sa Rome, naghingyo naman si Pope Francis sang dayalogo sa tunga sang magkaaway nga military factions sa Sudan.
Nag-apelar man ini sa mga tumuluo nga magpangamuyo para sa mga residente sang amo nga pungsod nga naipit sa kinagamo.
