ILOILO – Patay ang duha ka lalaki nga nagakutkot sang bubon sa Brgy. Dusacan, Leon, Iloilo.
Ang mga biktima amo sanday Gebert Cag-ang, residente sang Brgy. Coyugan Norte Leon, Iloilo kag Stephen Canindo sang Dusacan, Leon, Iloilo
Sa interview sang Bombo Radyo kay Police Captain Melchor Tolentino, hepe sang Leon Municipal Police Station, iya ginpahayag nga na-suffocate ang mga biktima samtang nagakutkot sang 20 ka tapak nga bubon.
Suno kay Tolentino, si Cag-ang ang yara sa idalom kag yara naman sa ibabaw si Canindo.
May isa pa gid ang mga ini ka upod nga si Roben Cabañero nga yara man sa ibabaw nga nagabulig sa pagpasaka sang duta.
Nagpauli sang makadali si Cabañero kag pagbalik sini, wala na niya makita sanday Cag-ang kag Canindo.
Sang naglantaw siya sa bubon, yara ang duha sa idalom kag wala na nagaginhawa.
Gindala pa ang mga ini sa ospital, apang gindeklarar sang doktor nga dead on arrival.
