ILOILO CITY – Patay ang bana sang gintiro ang kaugalingon matapos ginluthang man ang iya asawa sa Paclibar St., Barangay Cuartero, Jaro, Iloilo City.
Ang bana amo si Romeo Paclibar, 66, anay chief mate sa barko samtang ang asawa ang ginkilala kay Sara Paclibar, 62, negosyante, lunsay mga residente sang nasambit nga lugar.
Sa interview sang Bombo Radyo kay Eda Mae Paclibar, umagad sang mag-asawa kag nakasaksi sang insidente, iya ginpahayag nga nagahimos sang lulutu-on ang asawa sang nagpanaog ang bana kag nagasinggitan.
Ginpamangkot sini ang iya asawa kun ngaa nga naka-lock ang kwarto kag nagsinggit nga pasudlon ini.
Nagsabat ang asawa kag gilayon ini nga ginkaptan sang iya bana sa iya butkon kag ginsakit.
Dugang pa sang natungdan, nagabato man ang iya ugangan nga babayi.
Hinali lang nga nagbunot sang pusil ang iya ugangan nga lalaki kag nagpasalba.
Nagpanaog naman ang kamanghuran nga anak sang mag-asawa kag ginkup-an ang iya amay samtang ang asawa ang nagapugong man sa iya bana.
Natiruhan ang asawa kag may igo sa paa kag gilayon nga gindala sa ospital.
Makaligad ang duha ka minutos, may nabatian nga isa pa ka lupok nga ginapatihan nga gintiro na sang bana ang iya nga kaugalingon.
Patal naman nga pilas sa ulo ang naagum sang bana.
Suno sa umagad, separado na ang iya mga ugangan pila ka tuig na ang nakaligad kag nagatulog sa separado nga hulot kag may tagsa-tagsa ka salakyan.
Sa impormasyon nga nabaton sang Bombo Radyo, may ginprenda nga duta ang asawa nga amo ang masami nga gina-awayan sang mag-asawa.
