ILOILO CITY – Nagpahanumdom ang anay police officer sa mga katapo sang Philippine National Police nga magpabilin sang maayo nga panghimanwa sa publiko.
Ini matapos ang pagpakamalaot sa mga kapulisan kasunod sa pagka-angot sa mga full-fledged colonels kag generals sa illegal drug trade kag sa kontrobersyal nga Degamo assasination sa diin ginatudlo nga gunmen ang mga anay katapo man sang Philippine National Police.
Sa interview sang Bombo Radyo kay Retired Police Lieutenant Angel Sales, Vice President sang Philippine National Police Retirees Association Inc. – Visayas, iya ginpahayag nga apisar isolated case ang pagkalakip sang mga police personnel, nagapabilin ang mayoriya sa mga ini nga naga-ulikid sa katungdanan.
Suno kay Sales, naga-apelar ini sa mga kapulisan nga mahimo tadlungon ang gawi kag indi gid mag-gamit sang armas bangud ini lamang ang masami nga ginagamit bilang katapusan nga tikang batok sa krimen.
Ginpahayag dugang sang natungdan nga isa ka dungganon nga propesyon ang malakip sa Philippine National Police, gani nagakadapat nga ipakita ang maayo nga halimbawa sa luyag nga mangin kabahin sang propesyon.
Nahibaluan nga isa si Sales sa ginpasidunggan sang Armed Forces of the Philippines sang 1982 bilang Kawal Awardee kag nalakip sa Top 10 Outstanding Policemen sang 2021.
