May posible na nga mga investments nga na-report ang Presidential Communications Office kadungan sang working visit ni President Ferdinand ‘Bongbong’ Marcos, Jr. sa Estados Unidos sang Amerika.
Isa diri ang nuclear energy firm nga nagaplano nga magpangita sang site sa Pilipinas kasunod sang meeting sa presidente.
Ini amo ang NuScale Power Corp. sang Oregon nga ginalauman nga maga-invest sang P360.9-billion tubtub P416.4-billion agud maka-provide sang 430 megawatts sa pungsod sa 2031.
Suno sa presidente, may yara sang kakulangan sa power supply sa Pilipinas ang kag ang suporta sang amo nga energy firm ang ginalantaw nga maka-address gid sa problema sa pungsod.
Ang small modular reactor technology sang amo nga firm amo ang una kag nagaisahanon nga nakaangkon sang design approval halin sa US Nuclear Regulatory Commission.
May yara man ini sang mga proyekto subong sa Utah, Romania, Indonesia, kag Poland nga nagahatag sang clean energy sa mga konsumidor.
Sa pihak nga kabahin, ginsaksihan man ni Marcos ang pagpirma sang duha ka firm sa memorandum of agreement agud nga maka-set up sang labing-una nga electronic vehicle motorcycle manufacturing site sa Pilipinas.
Suno sa Presidential Communications Office, nagapanguna ang ZERO Motorcycle sa paghimo sang de-kuryente nga mga motorsiklo sa masobra 15 ka tuig na sini sa industriya samtang ang IMI naman amo ang kilala sa patag sang electronics manufacturing kag paghimo sang mga bisikleta.
Kasunod sang pagpirma sang amo nga agreement, ang IMI-ZERO amo ang maga-umpisa sang pag-develop sangg electric vehicle ecosystem sa pungsod.
Ini nga deal ang ginalauman nga makahatag trabaho sa 200 ka mga indibidwal halin sa assembly line, manufacturing, packing kag shipping sang 18,000 ka electronic vehicles kada tuig.
Sa pihak nga bahin, nagsugtanay pa gid ang Pilipinas kag Amerika nga mag-set sang ministerial team sa agricultural cooperation samtang ginatutukan sang Marcos administration ang food efficiency kag security.
Nakasugtan ang partnership kasunod sang meeting ni Marcos sa US Department of Agriculture officials sa pagpanguna ni Secretary Thomas Vilsack.
