Patay ang walo ka mga estudyante kag isa ka security guard matapos ginpangluthang sang 13-anyos nga estudyante sa Belgrade, Serbia.
Magluwas sa mga napatay, nasamaran man sa amo nga mass shooting incident ang anum ka iban pa nga estudyante kag isa ka manunudlo kag padayon pa subong nga ginabulong sa ospital.
Suno sa pulis, arestado man mismo sa eskwelahan ang suspek nga isa ka grade 7 student. Gindakop man pati ang iya nga iloy kag amay.
Ginlaragway ang suspek nga isa ka “hipuson kag maayo man nga bata apang bag-o lang naka-impon sa klase.”
Indi pa subong maathag ang motibo sa amo nga pagpangluthang, apang ipaidalom ang dugo sang bata sa toxicological analysis agud matumod kun yara ini sa idalom sang impluwensya sang alcohol, narcotics, ukon iban pa nga psychoactive substances sang tion nga ginhimo ang krimen. Sunod man ini nga ipaidalom sa special psychiatric institution.
Una na nga ginpahayag ni Serbian Interior Minister Bratislav Gasic nga gindala sang bata ang duha ka pusil halin sa ila nga balay, kag antes sini, nakabisita ini anay sa isa ka shooting range kaupod sa iya nga amay.
Sandig sa statement sang Higher Public Prosecutor’s Office sa Belgrade, indi matawag nga “criminally responsible” ang suspek bangud wala pa ini nakatungtong sa 14-anyos sandig sa Law on Juvenile Offenders and the Criminal Legal Protection of Minors sang Serbia.
Sandig sa pinakaulihi nga statement halin sa pulisya, sinemana sang ginplano sang bata ang pagpamatay, kag may yara ini sang “kill list” ukon listahan sang iya patyon. Ginpahayag nga ginplano man sini kun ano nga classroom ang iya una nga sudlon.
Kalabanan sa mga biktima ang nabun-ag sang 2009 — buot silingon, yara sa 13 tubtub 14 anyos ang mga edad sang tion nga natabo ang krimen.
Gin-anunsyo man ni Education Minister Branko Ruzic nga may yara sang tatlo ka adlaw nga national mourning period sa Serbia kasunod sang amo nga makangilidlis nga krimen. ##
