ILOILO CITY – Gin-athag sang Department of Education nga nagapadayon ang pagtu-on sang mga kabataan apisar nga kanselado ang face-to-face classes bangud sang mamunog nga ulan nga dala sang low pressure area.
Sa Western Visayas, masobra sa isa ka libo nga mga eskwelahan ang nagkanselar sang face-to-face classes base sa deklarasyon sang local chief executives.
Sa interview sang Bombo Radyo kay Mr. Hernani Escullar, Jr., spokesperson sang Department of Education- Region VI, iya ginpahayag nga nag-shift lamang ang mga eskwelahan sa modular distance learning.
Suno kay Escullar, ini ang base sa Department of Education order no. 37 series of 2022 kun sa diin, mahimo nga mapatuman ang modular distance learning, performance task, projects kag make-up classes sa tion nga may suspension sang face-to-face classes bangud sang malain nga tyempo.
Ginpasiguro man sang ahensya nga malab-ot sa gihapon sang mga eskwelahan ang ila nga objective apisar nga kanselado ang face-to-face classes.
