Apisar sang malamig nga tyempo, naga-amat-amat na damo ang die-hard supporters nga nagatipon sa guwa sang Buckingham Palace sa London kag sa ruta sang prusisyon agud bantayan ang koronasyon ni King Charles III.
Dala sang Royal fans ang mga folding chairs, tents, sleeping bags kag snacks.
Ini nga loyal monarchists ang lunsay nagpili man sang maayo nga posisyon agud nga malantaw sang maayo ang prusisyon sang hari nga natalana pa sa buwas, Mayo 6.
Patigayunon ang maragtason nga seremonya para sa hari sa Westminster Abbey nga amo ang coronation church sang Britanya halin sang 1066.
Magluwas kay King Charles III, natalana man nga koronahan si Camilla bilang Queen Consort.
Magluwas sa Royal Family, magatambong man sa event ang prime minister, representatives halin sa Houses of Parliament, heads of state, kag iban pa nga royals halin sa iban nga mga pungsod.
Ginabantayan man ini sang bilog nga kalibutan bangud ini ang labing-una nga koronasyon sa Britanya sa sulod sang pito ka dekada matapos nga nagtaliwan na si Queen Elizabeth II sang nagligad nga Septyembre 2022. #
