ILOILO CITY – Ginpakigbahin ni Iloilo Governor Arthur Defensor Jr., nga yara na sa second stage sang consultancy process ang third-party consultant sang kontrobersyal nga ₱680-million Ungka Flyover.
Ini matapos nga nakigkita ang gobernador sa mga opsiyal sang Department of Public Works and Highways Region 6 kag sa Adam Abinales Engineering Consultancy, nga amo ang third-party consultant.
Sa interview sang Bombo Radyo kay Governor Defensor, iya ginpahayag nga posible nga ipagwa na ang resulta sang engineering interventions sa patigayunon nga Regional Development Council-Infrastructure Development Committee meeting sa Mayo 15.
Suno kay Defensor, itugyan niya kay Engineer Adam Abinales, tag-iya sang consultancy, ang pagpagwa sang imbestigasyon.
Samtang, ginhingyo naman sang gobernador ang publiko nga maghulat anay sang pag-eksplikar sang consultant natuhoy sa matuod-tuod nga natabo sa depektibo nga flyover.
