ILOILO CITY – Ginpasuni sang menor de edad nga suspek sa pagpatay sa call center agent nga nasapwan sa katubuhan sa Barangay Tinocuan, Dingle, Iloilo nga ginpilit ini sang biktima nga makighilawas, apang nagpamalabag ini, rason nga nag-init ang tensyon sa tunga sang duha.
Matandaan nga nasapwan nga wala na sang kabuhi si Dave Ablanzar, 35, nagatrabaho bilang call center agent, myembro sang lesbian, gay, bisexual, transgender, queer community, kag residente sang banwa sang Pototan nga natampukan sang dahon, nakaputos sa manipis nga habol, kag ginbilin sa katubuhan sa lugar.
Samtang ang mga suspek naman amo sanday Andrei Ticar, 20; kag Alyas ‘Jun’, 17-anyos.
Sa interview sang Bombo Radyo kay Police Captain Aileen Lacrite, Acting Chief sang Dingle Municipal Police Station, iya ginpahayag nga Mayo 11 sang naghagaday ang mga supek kag biktima nga mag-inom, kun sa diin nakaubos pa ang mga ini sang tatlo ka botelya sang rum.
Suno kay Lacrite, ginhagad ni Ablanzar si Alyas Jun nga magsulod sa kwarto agud makighilawas, apang nagpamalibad ang suspek, rason nga ginbuno ini sang biktima sa kamot.
Diri na kag nagpangayo sang bulig si Alyas Jun kay Ticar nga nagsulod sa kwarto kag ginlampusan sa ulo si Ablanzar gamit ang martilyo.
Ginpahayag dugang sang natungdan nga nagbato pa ang biktima, apang ginpakamaayo sang mga suspek nga kug-on ini asta nga ginbawian ini sang kabuhi.
Mayo 12 sa kaagahon sang gindala sang mga suspek ang biktima sa katubuhan kag ginbilin.
Ang ginapanag-iyahan naman nga motorsiklo sang biktima ang ginbilin sa distrito sang Jaro.
Kun balik-balikan, gin-report sang mga himata ni Ablanzar nga tatlo ka adlaw na ini nga missing.
Ang mga suspek naman ang nagsungka sa mga kapulisan, kag yara na sa kustodiya sang Dingle Municipal Police Station.
