ILOILO CITY – Isa sa mga ginarekomendar sang eksperto nga ratification scheme para sa depektibo nga mga flyovers amo ang pag-demolish sini.
Ini matapos matukiban nga may yara sang vertical displacement ang 16 ka mga piers sa kontrobersyal nga P680-million Ungka Flyover, kag ang pag-suspend sang ginahimo nga konstruksiyon sa Aganan Flyover.
Sa interview sang Bombo Radyo kay Engr. Nilo Jardeleza, Private Sector Representative kag myembro sang Infrastructure Development Committee, iya ginpahayag nga mas maayo nga i-demolish ang flyovers kag islan ini sang mas safe kag mapag-on nga istruktura.
Suno naman kay Jardeleza,may kaangtanan sa ginrekomendar sang consultant nga nagpatigayon sang geotechnical investigation nga magdugang sang apat ka mga bored piles sa idalom sang Piers 4, 5, kag 6 kag butangan sang pile cap, kag ang nabilin nga pile caps ang i-underpinning.
Kinahanglan man suno sang consultant nga i-jet grouting ang flyover, apang indi lang bisan sin-o nga kontraktor, kundi ang specialized gid agud ma-stabilize ang duta kag madugangan ang pagkupo sang soil sa pile nga steel kun sa diin mahimo nga madala sini ang kabug-aton nga ginabulubanta nga 35 tubtob 40 nga tonelada.
Matandaan nga gin jet grouting sang kontraktor nga International Builders Coroporation ang Ungka Flyover, apang wala ini nakasunod sa insakto nga procedure, rason nga may pag-usmod sa gihapon ang mga piers.
Ginpahayag dugang sang natungdan nga tutal nakatuga na sang perwisyo ang proyekto, nagakadapat nga ipasiguro nalang sang mga ini nga indi na maliwat pa ang problema sa istruktura.
Sa subong, nagakinahanglan sang indi magnubo sa P250-million nga pondo para sa pagkaayo sang Ungka flyover kag ginabanta nga magadangat sa 10 ka bulan ang rehabilitasyon kun sa diin posible mabuksan ini liwat sa publiko sa Dinagyang Festival 2025.
