PASSI CITY – Ginpasakaan na sang kaso ang driver sang ceres bus nga nagbunggo sa fuel tanker sa Barangay Man-it, Passi City sa diin 14 ang napilasan.
Ang driver sang bus amo si Jose Hardie, 56, residente sang Barangay Dao, Capiz.
Samtang ang driver naman sang fuel tanker amo si Joel Carbajosa, 43, sang Barangay Paraiso, Sagay City, Negros Occidental.
Sa interview sang Bombo Radyo kay Policer Lt. Col. Aaron Palomo, hepe sang Passi City Police Station, iya ginpahayag nga ginkustodiya nila ang driver sang ceres bus matapos ang aksidente.
Lunsay naghalin sa Iloilo City ang bus kag fuel tanker.
Suno kay Palomo, pag-abot sa Barangay Man-it, nagpangihi ang driver sang fuel tanker sa diin temporaryo sini nga gin-park sini ang salakyan sa kilid sang karsada.
Wala naman nadiparahan sang driver sang bus ang fuel tanker rason nga nabungguan niya ini sa likod.
Nawasak naman ang nauna nga bahin sang bus bangud sa tuman kabaskog nga impact sa pagbunggo sini sa fuel tanker.
Ang iban nga mga pasahero ang gilayon man nga nakagwa sa ospital matapos mag-angkon sang menor nga mga pilas sa lawas.
Sa subong, nagapangatubang ang driver sang bus sang kaso nga reckless imprudence resulting to multiple physical injuries.
