Ginpasigurado ni President Ferdinand “Bongbong” Marcos Jr. nga handa ang gobyerno sa posible epekto kun makasulod na ang Super Typhoon Mawar sa Pilipinas.
Suno sa presidente, ginahanda na sang national government ang bulig indi lamang para sa northern portion kundi sa iban pa nga bahin sang pungsod.
Suno naman sa Armed Forces of the Philippines (AFP), iga-deploy sini ang 12,000 ka tropa agud magbulig sa maapektuhan nga mga residente.
Ginhanda naman ang mga salakyan para indi na mabudlayan ang mga pumuluyo sa mandatory evacuation.
Naka-standby man ang air kag naval assets para sa deployment kag kun kinahanglan na ang aerial assessment, transport, kag evacuation operations.
Kabug-usan nga 2,518 ka land transportation assets, 20 ka air assets kag 265 maritime assets ang paguwa-on para sa mga operasyon.
Sa bahin sang Department of Social Welfare and Development (DSWD), ginpahayag ni Secretary Rex Gatchalian nga nag-deploy ang ahensya sang isa ka milyon nga family food packs sa bilog nga pungsod. #
