ILOILO – Ginalantaw ni Iloilo Governor Arthur “Toto” Defensor Jr., nga may yara sang indi pag-intindihanay sa tunga sang League of Municipalities of the Philippines – Iloilo Chapter kag anay Schools Division Superintendent sa probinsya sang Iloilo.
Ini matapos ang kontrobersyal nga pag-file sang petisyon sa Department of Education sang 34 tanan ka mga alkalde sa probinsya sang Iloilo agud kakson Dr. Ma. Luz De Los Reyes sa katungdanan bangud sa ginapahayag nga “arogante” kag “matinaas-taason” ini.
Sa interview sang Bombo Radyo kay Governor Defensor, iya ginpahayag nga nagakinahanglan kuntani sang maayo nga bentilasyon ang palibot–gin-istoryahan kag ginpatahaw ang sitwasyon antes ang desisyon nga kakson ang superintendent sa katungdanan.
Sa matuod suno sa gobernador, isa si De Los Reyes sa naghikot sang programa para sa sektor sang edukasyon pinaagi sa Bulig Eskwela sa Probinsya nga isa ka programa para sa relevant, effective, kag transformative nga educational system.
Matandaan nga Mayo 15, 2023 sang ginmando ni Department of Education Undersecretary Atty. Revsee Escobedo ang pagkakas kay De Los Reyes sa katungdanan kag ginbalik liwat bilang Division Superintendent sang Division of Iloilo City.
Samtang, nagdepensa naman si De los Reyes nga na-misinterpret lamang ini sang League of Municipalities of the Philippines – Iloilo Chapter sa iya nangin panabat kag pamatasan.
