Posible nga ipa-iway sang Senate impeachment court ang nakatalana nga binotohay subong nga adlaw kaangot sa kadamuon sang boto nga kinahanglan para ma-convict sa impeachment si Vice President Sara Duterte.
Suno kay impeachment court spokesperson Regie Tongol, may pila ka senator-judge nga nagapangayo sang dugang nga tion agod matun-an sing maayo ang isyu bangod subong man nga adlaw himuon ang oral arguments sang prosecution kag defense.
Pahayag ni Tongol, posible nga maghatag sang dugang nga mga argumento ang duha ka kampo nga wala nalakip sa mga nauna nga ginpresentar sang mga amici curiae ukon “friends of the court.”
Bangud sini, posible nga magpangayo ang pila ka senator-judge nga ipaiway ang botohay kag himuon ini sa iban nga adlaw sa masunod nga semana.
Ang isyu nagasentro sa ruling ni Presiding Officer Francis Escudero nga kinahanglan ang 16 ka boto, ukon two-thirds sang 24 ka senador, para ma-convict si Duterte. Nag-manifest naman ini ni Senator Erwin Tulfo sang klaripikasyon bangud apat sa 24 ka senador ang wala nagapartisipar sa impeachment trial.#
