Ginpirmahan ni Ugandan president Yoweri Museveni ang ginakabig pinaka-mapintas nga hagna batok lesbian, gay, bisexual, transgender, intersex, queer/questioning (LGBTQ+) community.
Iligal na nga daan ang homosexual acts sa Uganda kaangay sa 30 ka iban pa nga African nations, apang nangin mas mapintas ini bangud sa idalom sang Anti-Homosexuality Act 2023, ang sin-o man nga ma-convict ang magapangatubang sang life imprisonment.
Ipatuman man ang death penalty sa “aggravated homosexuality” kaangay sang pagpakighilawas sang LGBTQ+ community member nga HIV positive. Magaatubang man sang 20-ka tuig nga pagka-preso ang sin-o man nga maga-promote sang homosexuality.
Sini lang nga bulan sang ginpasar sang mga mamalidha ini nga hagna kun sa diin ginpanindugan nga ini nga layi ang magatindog nga proteksyon sang national culture kag values sa Uganda.
Gilayon man ini nga ginkondenar sang United States, United Kingdom, European Union kag international human rights groups.
Ang UN High Commissioner for Human Rights nga si Volker Turk ang naglaragway sa amo nga layi bilang isa sa pinamalala nga layi sa kalibutan.
Mangin si US President Joe Biden ang nagsiling nga ginakonsiderar sang Washington ang pagpanaog sang sanctions kag indi pagasudlon sa United States ang tanan nga involved sa serious human rights abuses lakip na ang Ugandan officials.
Isa ka majority-Christian nation ang Uganda kun sa diin ginapakamalaot ang homosexuals kag ginakabig naman ang same-sex relationships nga isa ka “import” halin sa West. #
