Gin-sentensyahan sang 10 ka tuig nga pagka-preso ang isa ka lalaki sa Wisconsin sa Estados Unidos sang Amerika bangud sa sex trafficking sa pila ka mga menor de edad sa Pilipinas.
Suno sa United States Department of Justice, nagbyahe si Donald Stenson, 67, sa Pilipinas halin sang 2007 kag sulit-sulit nga naghimo sang sexual activity sa mga menor de edad sa pungsod.
Sang 2016 tubtub 2019, ginpilit man sini ang lima ka mga biktima edad 11-17 anyos nga magpakigbahin sa commercial sex arrangements.
Nagpakighilawas siya sa mga biktima kabaylo sang kuwarta kag mga regalo.
Nakit-an man sa electronic devices ni Stenson ang mga laragway kag videos sang mga menor de edad lakip na mismo ang akto sang pagpakighilawas ni Stenson sa biktima.
Suno pa sa US DOJ, may nakit-an man nga mga bastos nga mensahe sa mga menor de edad, kag gintulod man ni Stenson ang mga biktima nga magpakighilawas sa isa pa ka lalaki nga si John Burgdorff, 66, nga residente man sang West Allis sa Wisconsin.
Nag-upod si Burgdorff kay Stenson sa Pilipinas kag gin-haylo ni Stenson ang mga biktima nga magpakigkita sa iya nga upod.
Na-identify si Stenson paagi sa CyberTipline Report halin sa National Center for Missing and Exploited Children.
Pareho nga gindakop sanday Stenson kag Burgdorff sa balay ni Burgdorff sa West Allis kag ginkasuhan bilang co-defendants may kaangtanan sa sex trafficking sa minor victims.
Suno pa sa US DOJ, na-sentensyahan si Burgdorff sang Nobyembre 2022 sang duha ka tuig kag tunga nga pagka-preso.
Si Stenson naman ang mapreso sa 10 ka tuig kag ginmanduan nga magbayad sang $40,000 ukon masobra P2.2-million sa restitution kag $10,000 ukon masobra P560,000 sa special assessment.
Kun makaguwa na sa presuhan, ipaidalom gihapon ang 10 ka tuig sini sa supervised release.
Nagbulig sa imbestigasyon sa kaso ang Pilipinas kaupod sa Homeland Security Investigations sang Milwaukee kag Bangkok, kag amo man ang Manila Transnational Criminal Investigation Unit. #
