Magalab-ot sa P141 billion ang gastuhon sa pagkay-o sa Ninoy Aquino International Airport (NAIA).
Ini ang estimate sang Department of Transportation (DOTr) kag sang Manila International Airport Authority (MIAA) sang ginpasa ang joint proposal para sa Public-Private Partnership (PPP) project sa National Economic Development Authority (NEDA) Board.
Tuyo sini nga proyekto nga mahatagan ang private concessionaire sang 15 ka tuig agud nga maka-operate sa airport kag mabawi ang investment.
Suno kay Transport Undersecretary Roberto Lim, kinahanglan pa nga makuha ang ahensya ang commitment obligations halin sa private proponent sa sahi sang investment nga ila ibubo sa airport.
Panugyan sini sa sin-o man nga luyag mag-intra, kinahanglan anay magbayad sang P30 billion sa gobyerno.
Sa terms and conditions suno sa natungdan, kinahanglan nga may annual payment nga P2 billion kada tuig.
Gin-athag sini nga kinahanglan nga may share ang gobyerno sa revenue.
Pasalig pa sang transport official, kun i-privatize ang NAIA, indi buot silingon sini nga ibaligya na ini sa pribado nga sektor.
Kinahanglan lang suno sa natungdan nga ihatag ang prangkisa sa nagdaog sa right to operate kag right to rehabilitate.
Matandaan nga una man nga ginpahayag ni Lim nga sa 1st quarter sang 2024 mapatigayon ang privatization.
