ANTIQUE – Nagpa-iway si Antique Governor Rhodora Cadiao nga magpagwa sang kumento natuhoy sa mando sang Seventh Division sang Sandiganbayan nga arestuhon ini bangud sa ginapahayag paglapas sa Anti-Graft and Corrupt Practices Act.
Ini ang santo sa mensahe nga ginpadala ni Cadiao sa Bombo Radyo Iloilo.
“Cool muna tayo. That’s a case of and employee si Dela Vega on AWOL asking for salary. Silent anay ako hope you understand,” kabahin sang mensahe ni Cadiao.
Ang warrant of arrest ang ginpagwa ni Seventh Division Chairperson Associate Justice Ma. Theresa Dolores Estoesta kag may pyansa nga P90,000.
Nag-ugat ang kaso sang tuig 2016 matapos gin-reassign ni Cadiao si General Services Office head Antonio Dela Vega sa ila satellite office sa Culasi, nga may kalayuon nga 100 kilometers sa provincial capitol sa banwa sang San Jose.
Gindangop naman ni Dela Vega ang ”transfer order” sa Civil Service Commission, sa iya pagpati nga katumbas ini sang ”constructive dismissal”.
Sang Marso 2017, ginmando sang Civil Service Commission ang pag-reinstate kay Dela Vega sa Provincial General Services Office kag gin-request ang provincial government nga bayaran ini sang iya representation kag travel allowance (RATA) kag iban pa nga benefits nga nagakadapat sa iya sang tyempo nga gin-reassign ini sa Culasi, umpisa sang Hulyo 2016 tubtub Pebrero 2018.
Nagdesisyon naman si Dela Vega nga magpasaka sang reklamo batok kay Cadiao sa Office of the Ombudsman Visayas sang tuig 2018 matapos wala ini nakabaton sang benefits nga ginmando sang Civil Service Commission.
Wala naman ginpirmahan sang gobernador ang iya daily time record (DTR) nga nagresulta sa kapaslawan sang Provincial Accountant kag Provincial Treasurer nga iproseso ang pagpagwa sang iya benepisyo.
Nakitaan naman sang Ombudsman sang probable cause agud i-indict si Cadiao sa one count sang paglapas sa Section 3(e) sang Republic Act 3019 ukon Anti-Graft and Corrupt Practices Act sa resolution nga napetsahan sang Setyembre 2, 2019.
Ini ang pirmado ni Deputy Ombudsman for the Visayas Paul Elmer Clemente kag gin-aprubahan ni Ombudsman Samuel Martires sang Oktubre 22, 2021.
Sang Hunyo 7, 2023, ginpagwa ang arrest warrant batok kay Cadiao.
“You are hereby commanded to arrest Rhodora J. Cadiao, Barangay Badiang, San Jose de Buenavista, Antique who stands charged of the above-stated crime and bring said accused before this Court to be dealt with as the Law and Rules of Court direct,” nasaad sa arrest warrant.
Ang mando nga arestuhon si Cadiao ang naka-address sa Philippine National Police (PNP) chief; director sang National Bureau of Investigation (NBI); chief of police sang San Jose, Antique; police provincial director sang Antique; director sang NBI sa Region 6; kag anuman nga law enforcement officer.
