ILOILO CITY – Naglunsyar sang duha ka short-range missiles ang North Korea sa east coast sini suno sa South Korean military, halos isa ka oras matapos nagpaandam ang Pyongyang sang “inevitable” response sa military drills sang tropa sang South Korea kag Estados Unidos.
Ang pinakaulihi nga tikang sang North Korea ang natabo kadungan sang pagbisita ni Jake Sullivan, ang national security adviser ni Joe Biden, sa Tokyo para sa pagsinapol upod sa iya Japanese kag South Korean counterparts.
Sa meeting upod sa national security adviser sang South Korea, Cho Tae-yong, kag sa National Security Advisor sang Japan nga si Takeo Akiba, ang tatlo ang nag-discuss may kaangtanan sa missile program sang North Korea kag ginkumpirma nga maga-upod sila agud nga untatan sang Pyonyang ang ila nuclear weapons.
Suno sa defense ministry sang Japan, duha ka mga ballistic missiles ang nagtupa sa exclusive economic zone sang pungsod nga posible, ginpalupad nagikan sa indi regular nga trajectory.
Ang isa ang nagtupa sa Sea of Japan ginabanta 110 km northwest sang Hegrua island nga kabahin sang Ishikawa prefecture, samtang ang isa naman ang ginabanta 250 km ang kalayuon.
Ang gobyerno ang natalana nga magpatigayon sang National Security Council meeting.
Personal nga naglantaw si South Korean President Yoon Suk Yeol samtang nga nagapatigayon sang joint live-fire exercises ang linibo ka South Korean kag United States troops.
Suno sa spokesperson sang Ministry of National Defense sang North Korea, ang drills ang may tinutuyo nga ma-escalate ang military tension sa rehiyon kag ang pwersa sini ang hugot nga nagasabat sa anuman nga protesta ukon pagpanggarit-garit sang kontra.
