ILOILO CITY – Ginatinguhaan sang Marcos Jr. administration nga makahatag sang livelihood packages sa baylo nga maghatag sang assistance para sa marginalized bangud nga mas gusto sang publiko nga magtrabaho para sa ila pamilya kag indi magpangayo sang ayuda nagikan sa gobyerno.
Suno kay President Ferdinand Marcos Jr., ang cash grants nga ginahatag sa pigado nga pamilya ang gina-updan sang livelihood packages.
Dugang pa sang presidente, nagapadayon ang paghatag sang farm machineries nagikan sa Department of Agriculture, scholarships nagikan sa Technical Education and Skills Development Authority, kag livelihood packages nagikan sa Department of Trade and Industry.
Nagapadayon man ang pagpakig-angut sa mga foreign governments agud nga masiguro nga ang mga overseas Filipino workers ang mahatagan sang proteksyon kag mapabilin ang regional stability.
Samtang, may kaangtanan sa pagselebrar sang ika-125 nga kahilwayan sang Pilipinas, ginpahayag ni Marcos nga ginatinguha-an man sang iya gobyerno nga mahilway ang pungsod nagikan sa kapigaduhon, kagutom, kag kakulang sang opurtunidad.
Nagpasalig man ang presidente nga nagapanghanda na ang gobyerno sa pagpadayon sa pagbulig sa mga Filipinos nga gin-evacuate nagikan sa 6-kilometer radius sang Mayon volcano.
