Ginpasalig sang kapulisan nga mas hugtan pa ang ipatuman nga mga tikang agud indi makalusot sang peke ukon counterfeit nga mga kwarta.
Sa interview sang Bombo Radyo kay Police Col. Joeresty Coronica, director sang Iloilo City Police Office, iya gin-ako nga indi madali nga matumod kun ang isa ka kwarta ang peke ukon indi.
Suno kay Coronica, pinaagi sa intelligence gathering, mahibaluan kun sa Iloilo City nagahalin ang mga peke nga kwarta.
Masami suno sa natungdan nga nagatuhaw ang mga peke nga kwarta sa tion sang eleksyon.
Gin-athag man sini nga indi buot silingon nga kun ang isa ka tawo ang nagbakal gamit ang peke nga kwarta, siya na ang source sini.
Nagpanugyan man si Coronica sa mga pumuluyo ilabi na sa mga vendors nga magpatigayon sang pagpanalawsaw sa kun paano mahibaluan ang peke nga kwarta.
Plano man sang natungdan nga maghingyo sa Bangko Sentral ng Pilipinas (BSP) sa pagpatigayon sang seminar natuhoy sa sini nga isyu.
