ILOILO CITY – Nagpanawagan ang defense ministry sang China nga untatan na sang Pilipinas ang tanan nga pagpang-garitgarit sa West Philippine Sea kasunod sang pagbalabag sang Chinese Coast Guard sa Philippine military supply boat malapit sa Ayungin Shoal.
Sa isa ka statement, ginpahayag sang ministry nga magapadayon ang tikang sang China agud nga maproteksyunan ang ila nga soberanya.
Una na nga gin-akusahan sang Chinese Embassy sa Manila ang Pilipinas nga nagahimo sang unilateral actions agud nga paluyahon ang naga-eksister nga management status quo sa Ayungin Shoal, kag nagpromisa nga kuhaon ang BRP Sierra Madre nagikan sa shoal nga nagapabilin nga grounded humalin sang 1999.
Gina-claim sang China ang bilog nga West Philippine Sea lakip na ang exclusive economic zone sang Pilipinas kaangay sang Ayungin Shoal. Padayon ini sa gihapon nga nagapakatig-a nga sundon ang ruling sang international tribunal nga nagabali sang ila claim sa lugar nga manggaranon sa resources.
