Iga-launch sang ‘Dapat Isa Lang’ Coalition sa September 30 ang ila website para sa People’s Initiative nga nagapanawagan sang anti-political dynasty law.
Sa interview sang Bombo Radyo kay Atty. Alex Lacson, president sang ‘Dapat isa lang’ coalition, iya ginpahayag nga paagi sa website, mahimo na makapirma ang mga Pilipino gamit ang ila cellphone, laptop ukon desktop.
Suno kay Atty. Lacson, indi na kinahanglan magkadto pa sa mga lugar nga may manual nga pagpirma ang publiko bangud mahimo na ini online kag bisan diin nga lugar pati na ang mga Overseas Filipino Workers (OFW) ang sarang gid nga makapasagop sa nasambit nga movement.
Pahayag sang abogado, nagsugod na sila sang manual nga pagpangolekta sang pirma mga tatlo ka bulan na ang nagligad kag nakalikom sang sobra 10,000 ka pirma.
Apang sa subong, maga-focus sila sa digital signing bangou mas simple kag mas dali ini para sa mga gusto mag-upod sa petition.
Pagpaathag niya, ang ila proposed anti-dynasty law ang katuyuan nga mapasa ang layi nga dapat isa lamang ka miyembro sa isa ka pamilya ang may posisyon sa national level kag isa naman sa local level.
Gina-propose man pagbawal tubtob fourth degree nga mga paryente nga magsunod sa pwesto, mag-upod sa pagdalagan ukon magbayluhanay sang pwesto.
Dugang pa ni Atty. Lacson, target nila nga mangin isa ini ka layi antes sang 2028 elections agud, suno sa iya, mahimo nga mapunggan na ang political dynasties sa amo nga eleksyon.
