Anum na ka mga Pinoy ang kumpirmado nga nalakip sa napatay sa lapnagon nga wildfires sa Lahaina sa Maui, Hawaii, USA.
Ini amo sanday Salvador Coloma, 77; Carlo Tobias, 54; Rodolfo Rocutan, 76; Conchita Sagudang, 75; Danilo Sagudang, 55; kag Alfredo Galinato, 79.
Ginapangita pa subong sang otoridad ang walo pa ka mga myembro sang pamilya ni Salvador Coloma lakip na ang iya asawa nga si Lydia, kag ang mga himata nga sanday Joel Villegas, Adela Villegas, Junmark Quijano, Felimon Quijano, Luz Bernabe, kag Glenda Yabes.
Sandig sa pinakaulihi nga report sa Maui, yara na sa 115 ka mga tawo ang napatay sang natabo ang sunog sang Agusto 8 kag amo ang ginakabig pinakamakamamatay nga wildfires sa maragtas sang Estados Unidos sa sulod sang isa ka siglo.
Duha ka semana matapos ang amo nga sunog, lapaw pa sa 1,000 ang ginapatihan nga missing samtang padayon naman ang paghingyo sang Federal Bureau of Investigation (FBI) sa mga pamilya nga magbulig agud madasig nga ma-identify ang pangalan sang mga bangkay. #
