ILOILO CITY- Ginakabalak-an sang mga mangunguma sa probinsya sang Iloilo ang malain nga epekto sang tuman nga pag-ulan kag pagbaha.
Sa interview sang Bombo Radyo kay Nilida Seguera, isa ka manunguma sa Dongsol, Pototan, Iloilo, iya ginpahayag nga sa sulod lang sang pila ka adlaw nga pag-ulan, naglapaw na sa ila mga humayan ang tubig.
Suno kay Seguera, nagapasalamat man kuntani sila sa ulan bangud nga malawig man nga mga semana nga mala ang talamnan apang indi man kuntani sa punto nga magkalaguba ang ila pananom.
Sa pagkamatuod suno sa iya, may yara gani sang tatlo ka beses magsulit sang sab-og bangud ginaguba sang baha.
Ginabasol naman sang mga ini ang manabaw nga kanal sang National Irrigation Administration kun ngaa nagaawas ang tubig kag nagakadto sa mga talamnan.
Sa interview naman sang Bombo Radyo kay Engr. Randy Alipis, Division Manager A for Iloilo-Guimaras Irrigation Management Office sang National Irrigation Administration, iya ginpahayag nga operating procedure na nila nga siraduhan ang intake gate agud indi magkadto sa kanal sa tion nga magbubo ang ulan.
Suno kay Alipis, nagahalin sa mga nagaawas nga kasubaan ang tubig nga nagakadto sa mga talamnan kag indi halin sa dam sang National Irrigation Administration.
