Ginkumpirma ni Russian Defense Minister Sergei Shoigu nga naga-istoryahanay ang Russia kag ang North Korea para sa posible pagpatigayon sang joint military excercises.
Una na naguwa ang reports halin sa intelligence agency sa South Korea nga ang Russia ang nag-propose kay North Korean leader Kim Jong Un nga magpatigayon sila sang magkaupod nga naval exercise nga kaupod pa gid sa China.
Madumduman nga nagkitaay si Shoigu kag si Kim sang nagligad nga Hulyo sang nagbisita ini sa North Korea para sa 70th anniversary sang pagtakop sang Korean War nga ginatawag sa North Korea nga “Victory Day”.
Ang Estados Unidos sang Amerika naman ang una na nagpahayag sang nagligad nga semana nga padayon ang negosasyon sang Pyongyang kag Moscow sa ila nga mga armas, kag nagtilaw pa ang Moscow nga kumbinsehon ang Pyongyang nga magbaligya sang artillery ammunition sa Russia.
Una naman nagpaandam ang Washington nga posible maghatag ang North Korea sang hinganiban sa Moscow agud gamiton sa away sa Ukraine.
Nahibaluan nga anum na ka nuclear tests ang napatigayon sang North Korea halin sang 2006 kag nagapalupad man ini sang nanuhay-tuhay nga missiles apang malaka lamang ini naga-upod sa kaiping nga mga pungsod kun magpatigayon sang military exercises. #
