ILOILO CITY- Nagpahanumdom ang Philippine National Police sa publiko may kaangtanan sa pagdumili sa pagdala sang mga gun replica subong nga ginapatuman ang gunban para sa 2023 Barangay and Sanggunian Kabataan elections.
Sa interview sang Bombo Radyo kay Police Maj Rolando Araño, spokesperson sang Iloilo Police Provincial Office, iya ginpahayag nga may mga penalidad nga idagdag sa sin-o man nga madakpan nga nagadala sang replica guns, kalakip na ang toy guns, airguns, airsoft guns, antique firearms, kag iban nga replicas ukon imitations sang pusil magluwas pa nga arestuhon ang mga ini.
Suno kay Araño, indi mahimo ang isa ka indibidwal nga magdala sang armas ukon iban nga hinganiban kun ang possession sini ang indi man kinahanglan bisan pa nga lisensyado ang ila armas.
Ang mga indibidwal lamang nga nag-apply kag nakakuha sang certificate of authority halin sa Commission on Elections ang makadala sang armas sa tion sang eleksyon.
Samtang, gin-ako naman ni Araño nga kulang ang numero sang kapulisan sa Iloilo para sa deployment sa eleksyon.
Suno sa iya, may yara lang sang kapin 2,000 ang ila personnel kag kinahanglan sang dugang nga 1,000 ka mga personnel.
