ILOILO CITY- Dako ang posibilidad nga makapasakop liwat ang mga eskwelahan sa tribes competition sa Dinagyang Festival 2024.
Sa interview sang Bombo Radyo kay Ms Joyce Clavecillas, executive Director sang Iloilo Festivals Foundation Incorporated, iya ginpahayag nga nagpabutyag sang interes ang mga eskwelahan nga magpartisipar liwat sa tribes competition.
Suno kay Clavecillas, resulta ini sang pila ka consultative meetings kaupod ang mga principals kag mga opisyal sang Department of Education, mga tribu, organisasyon, festival artist, kag food fest organizers.
Pahayag ni Clavecillas, ini ang istoryahan sa masunod pa nga mga pagsinapol agud ma-finalize ang plano.
Paathag sang natungdan, indi man ini mahapos bangud madamo sang dapat asikasuhon kaangay sang memorandum of understanding sa tunga sang Iloilo Festivals Foundation Incorporated kag Department of Education.
Matandaan nga sang nagligad nga tuig, lunsay barangay- based ang mga tribu bangud wala gintugutan ang mga eskwelahan agud indi maapektuhan ang pag-eskwela sang mga kabataan base man sa nangin mando ni Vice President kag Education Secretary Sara Duterte.
