ILOILO CITY- Nagpatawag sang joint emergency meeting si Iloilo Governor Arthur Defensor Jr. kaupod ang Provincial Price Coordinating Council kag Provincial Economic Cluster agud diskusyonan ang Executive Order 39 nga gin-isyu ni Pres. Ferdinand Marcos Jr. sa pagpatuman sang price ceiling sa bugas.
Sa interview sang Bombo Radyo kay Defensor, iya ginpahayag nga ginkonsulta niya ang Department of Agriculture, Deparment of Trade and Industry kag Bureau of Customs sa responsibilidad sang local government units may kaangtanan sa monitoring kag inspection sang posible hoarding kag pagpataas sang presyo sa sulod sang ila hurisdiksyon.
Subong nga adlaw, Septyembre 6, liwat nga magasapol ang council para sa pagpasar sang resolution sa price monitoring kag activation sang local price control committee sa mga banwa.
Magapakigkita man ang gobernador sa mga rice traders may kaangtanan sa price cap.
Sa idalom sang EO 39, ang price ceiling para sa regular milled rice ang nagabalor P41 per kilogram kag P45 per kilogram para sa well-milled rice.
