ILOILO CITY- Nadakpan sa isa ka buybust operation sa Barangay PD Monfort North, Dumangas, Iloilo ang ginatudlo mastermind sa insidente sang pagpang-hold up kag pagpang-carnap sa pila ka mga banwa sa 4th district sang Iloilo.
Ang arestado amo si Jepster Bonillo alyas Jep-jep, 24, residente sang Barangay Naslo, Pototan kag nagapanag-iya sang talyer kag kilala sa ila lugar nga madamo ini sang kwarta.
Nabaklan si Bonillo sang isa ka sachet sang illegal nga droga nga nagabalor sang 22,000 pesos.
Nakuhaan pa gid ini sang walo ka sachet sang shabu nga nagabug-at sang ginabanta 50 grams kag may standard drug price nga P340,000.
Sa interview sang Bombo Radyo kay PMajor Kenn Albert Lepsia, hepe sang Dumangas Municipal Police Station, iya ginpahayag nga namutikan nila ang iligal nga aktibidad ni Bonillo kag may mga kaupdanan kag tinawo ini nga ginasugo.
Suno kay Lepsia, si Bonillo ang na-involve man sa hold-up incident sa Pototan kun sa diin napreso ang duha niya ka kaupdanan sang nadakpan man sa buybust operation.
