ILOILO CITY- Arestado ang apat ka mga manugpangisda samtang nakapalagyo naman ang walo ka iban pa sa ginpatigayon nga Anti-Illegal Fishing Operation sang Banate Municipal Police Station kag Banate Municipal Bantay Dagat.
Ang mga nadakpan amo ang masunod: Raul Barredo, 47; Justine Benting ,18; Fernan Dela Cruz, 34; kag Paolo Lozada, 27 nga lunsay mga residente sang Brgy. San Juan, Barotac Viejo, Iloilo.
Sa interview sang Bombo Radyo kay PLt Dandy Ilalto, Officer In-Charge sang Banate Municipal Police Station, iya ginapahayag nga apat lang ang ila naaresto bangud nga wala nila naabtan ang walo ka iban pa nga illegal fishers nga nakahingagaw palagyo bangud isa lang ang motorboat nga naga- operate.
Suno kay Ilalto, ginlapas sang mga arestado ang Municipal Ordinance batok sa illegal fishing bangud wala ang mga ini sang lisensya, indi man sila rehistrado sa Municipal Registry, kag indi man rehistrado ang ila sakayan magluwas pa sa paggamit sang mga ini sang active gear kag fine mesh net.
Narekober naman sa mga manugpangisa ang mga kalat kag mga fishing nets nga ila ginagamit sa pagpangisda.
