Gintawag sang White House nga wala sang basehan ang alegasyon batok kay United States President Joe Biden kasunod sang ginlunsar sang Republican lawmakers nga impeachment inquiry.
Wala pa gihapon sang komento ang 80-anyos nga presidente kaangot sa amo nga impeachment, apang nagapanindugan naman ang iya nga spokesperson nga kahimuan lamang ini sang iya kasumpong sa pulitika.
Suno kay Press Secretary Karine Jean-Pierre, bilog nga tuig nga nag-imbestigar ang Republicans agud pangitaan sang sala ang presidente apang wala sila sang matipon nga ebidensya bangud wala man ini sang ginhimo nga iregularidad.
Antes sini, una na nga gin-akusaran sang Republican House members si Biden nga nagbutig sa Americans kaangot sa kontrobersyal nga mga buluhaton sang iya anak nga si Hunter sa luwas sang pungsod.
Si Hunter amo ang anak ni Biden nga isa anay ka drug addict kag ginaimbestigaran sang Justice Department special counsel bangud sa posible nga tax evasion kag posible nga kasuhan man subong nga bulan bangud sa firearms violation.
Apang suno sa White House, indi gani makatipon ang Republicans sang bastante nga suporta agud nga maka-boto ang House kag maaprubahan ang impeachment inquiry.
Ang ginaduso nga impeachment inquiry ang kadungan man sa ginalantaw nga rematch nanday Biden kag former president Donald Trump sa presidential election sa masunod nga tuig.
