ILOILO CITY- Ginkumpirma sang Department of Public Works and Highways Region 6 nga tatlo ka spans sang Ungka Flyover ang ginrekomendar sang third party consultant nga wasakon nalang.
Sa interview sang Bombo Radyo kay Engr. Sonny Boy Oropel, director sang Department of Public Works and Highways Region 6, iya ginpahayag nga sa rekomendasyon sang Abinales Associates Engineers + Consultants, ang spans 4 to 5, 5 to 6, kag 6 to 7 nga sakop sang Ungka, Jaro, Iloilo City amo ang i- demolish.
Suno kay Oropel, ang contractor nga International Builders Corporation amo ang magagasto sang demolition kag restoration sang wasakon nga spans.
Pahayag pa niya, ang pagwasak sang spans ang nagatuyo nga maghatag ligwa sa pagbutang sang mga kinahanglanon nga mga equipment.
Dugang sang natungdan, ang mga minor works naman kaangay sang jet grouting ang gastuhan sang gobyerno.
Pahayag pa niya, antes magtakop ang tuig, may amat-amat na nga mga aktibidad para sa rectification kag ang iban ang patigayunon na lang sa 2024.
