ILOILO CITY- Tunga ang opinyon sang chairman sang Committee on Transportation sa Sangguniang Bayan sang Pavia sa nagahilapit na nga pagpatigayon sang ginrekomendar nga solusyon sang third party consultant nga pag-demolish sang tatlo ka spans sang Ungka flyover agud makay-o na ini ka magamit sang mga motorista.
Sa interview sang Bombo Radyo kay Sangguniang Bayan Member Jose Maria ‘Pyt’ Trimañez, iya ginpahayag nga nalipay ini bangud nga masolusyunan na gid ang problema kag ang contractor nga International Builders Corporation ang magasalo sang gasto.
Apang suno kay Trimañez, nabalaka man ini bangud nga pat-ud nga dako na naman ang matuga nga problema sa trapiko sang patigayunon nga mga construction works kag mangin malawig na naman ang pag-antos sang publiko.
Nagpangabay naman si Trimañez sa Department of Public Works and Highways nga kuntani mabayaran na ang mga tag-iya sang duta nga naapektuhan sang pagpatukod sang proyekto kasunod man sang pagbutang sang humps sa kilid sang dalan sa Ungka, Jaro sang tag-iya sang duta nga wala mabayaran sang gobyerno.
