Duha ka tuig nga manimuron sa presuhan ang isa ka babayi sa Indonesia nga nag-video sa iya kaugalingon nga nagsambit sang kabahin sang pangamuyo sang mga Muslim antes siya nagkaon sang baboy.
Ini amo ang 33-anyos nga si Lina Lutfiawati nga nagagamit sang Indian name nga “Lina Mukherjee” bangud sa iya nga hilig sa Bollywood movies.
Gina-identify niya ang iya kaugalingon nga Muslim. Isa man siya ka lifestyle influencer, may masobra duha ka million nga TikTok followers, kag nagapanag-iya sang negosyo sa India.
Sang Marso, nag-post siya sang video kun sa diin iya ginsambit ang tinaga nga “Bismillah” ukon ang Arabic phrase nga nagakahulugan nga “in the name of God”. Ginhimo niya ini antes siya nagkaon sang crispy nga panit sang baboy.
Sang amo nga tion, naga-byahe siya sa Bali, isa ka tourist hotspot sa Indonesia nga (indi kaangay sang nabilin nga bahin sang pungsod) may majority nga Hindu population.
Ginpanindugan sini nga sang amo nga tion, nagtilaw siya sang agud bulngon ang iya nga kuryosidad.
Milyon-milyon ang nagpakalamaot kag nainsulto sa video bangud ginadumilian ang baboy sa Islam nga amo ang dominant religion sa Indonesia. Sunod siya nga gin-report sa pulis bangud sa paglapta sang “hateful information” nga isa ka sahi sang “act of hostility over ethnicity, religion, and race.”
Sang sini lang, gin-desisyunan sang korte sa Palembang, South Sumatra, Indonesia nga “guilty” ang amo nga influencer sa paglapta sang impormasyon nga nagapakamalaot sa religious individuals kag partikular nga mga grupo.
Magluwas nga ma-preso ang babayi, ginpabayad man ini sang $16,200 ukon P918,000.
Kun indi niya ini mabayaran, madugangan sang tatlo ka bulan ang kalawigon sang iya pagtinir sa sulod sang presuhan. #
