Gin-detain na ang 16 ka mga opisyal sa Libya samtang nagapadayon ang imbestigasyon sa makamamatay nga baha nga nagluntad sa syudad sang Derna subong nga Septyembre bangud sang pag-collapse sang duha ka dams.
Sa statement sang attorney general, lakip sa na-detain amo ang alkalde sang syudad kag ang present kag former water infrastructure authorities.
Septyembre 10 sang nagluntad ang baha sa amo nga syudad nga ginkamatay sang halos 4,000 ka mga tawo kag yara sa 9,000 ang nagapabilin nga missing suno sa World Health Organization (WHO).
Sang nagligad lang nga semana, nagguwa ang mga tawo sa Derna para mag-protesta kag magpanawagan nga kakasan sang posisyon ang otoridad.
Gina-imbestigaran man subong sang prosecutors ang tanan nga iligal nga naka-benepisyo sa reconstruction project sang amo nga syudad.
Nahibaluan nga halin sang 1942, lima na ka makamamatay nga baha ang natabo sa Libya bangud sa ila nga dam reservoirs.
Ang duha ka mga dam nga narusdak sang sini nga bulan ang natukod sang 1973 tubtub 1977, kag gin-report nga wala na napaidalom sa maintenance halin sang 2002.
