Daku nga inspirasyon sa mga estudyante indi lamang sa India kundi sa bilog nga kalibutan ang ginhimo sang isa ka 92-anyos nga Lola nga pagpa-enrol sa eskwelahan sa labing-una nga tion sa bilog niya nga kabuhi.
Ini amo si Lola Salima Khan, nabun-ag sang 1931, residente sang Bulandshahr sa northern state sang Uttar Pradesh sa India, kag may yara na subong sang mga apo sa tuhod.
Nagpakasal si Lola Salima sa edad nga 14-anyos — duha ka tuig antes ang pagtakop sang British colonial rule sa India.
Photo Courtesy: AFP/Supplied
Para sa iya, isa ka handum ang dumot ang makatuon sa pagbasa kag pagsulat bangud wala man sang mga eskwelahan sa ila nga lugar sang siya ang gamay pa lamang.
Anum ka bulan lang ang nagligad, amat-amat nga nahatagan sang katumanan ini nga handum sang nag-upod si Lola sa mga estudyante nga mas bata sa iya sang masobra walo ka dekada.
Gina-updan siya sang asawa sang iya nga apo kun magkadto siya sa eskwelahan.
Sang nagligad lang nga semana, nagkuha siya sang literacy test nga opisyal nga nagdeklarar sa iya bilang literate.
Sa subong, makahibalo na ini magpirma kag mag-isip sang kuwarta.
Suno kay Lola, gina-into-into pa siya anay sang iya nga mga apo kun magpangayo sila sang kuwarta bangud indi man siya makahibalo mag-isip, apang bangud sa iya pagbalik sa eskwelahan, suno sa iya, indi na siya maintuan.
Pahayag pa sang local education officer sa India, si Lola Salima ang nagapamatuod nga wala sang limitasyon kag wala sang edad ang pagpaninguha nga makatuon.
Halimbawa, bangud sa pagpa-enrol ni Lola sa eskwelahan, 25 ka mga babayi halin sa ila nga lugar ang nagsulod man sa literacy classes lakip na dira ang iya duha ka umagad. #
