Gina-usisa pa sang Department of Foreign Affairs (DFA) kun ano ka matuod ang reports nga may mga Pinoy nga nalakip sa missing samtang ilabi pa nga naga-ibwal ang kinagamo sa tunga sang Israel kag Palestine.
Sandig sa statement sang Filipino community leader sa Israel nga si Marc Pleños nga naka-base sa Tel Aviv, nagakahangawa ang iban nga mg Pinoy nga ang ila himata sa amo nga pungsod ang nabihag sang Palestinian militant group nga Hamas.
Gin-athag sini nga wala sang kumpirmasyon nagikan sa Israeli Army apang may isa ka Pinoy nga nakatawag nga lakip ang iya bana sa gin-hostage kag gindala sa Gaza. Gin-alegar pa sang Overseas Filipino Worker (OFW) nga nabatian niya kag nakilala ang iya bana sa video nga gin-alegar gin-post pa sang Hamas.
Photo courtesy: Ibrahim Dahman/CNN
May news aggregator man nga naga-claim nga may Thai kag Filipino workers nga na-hostage.
Suno naman kay Israeli Ambassador to the Philippines Ilan Fluss, may masobra 30,000 ka Filipino nationals sa Israel apang wala pa sang verification kun may iban sa ila nga na-kidnap.
Sa bahin sang Overseas Workers Welfare Administration (OWWA), ginatutukan naman ang monitoring sa 200 ka OFWs nga naka-base sa Gaza Strip kun sa diin nagbase ang Palestinian Islamist group nga Hamas sang nagpaulan sila sang rockets. Lakip sa na-mensyonar nga kritikal nga mga area sa Gaza strip amo ang Ashkelon, Ashdod kag Sderot.
Wala man sang nag-request nga Filipinos para sa repatriation apang bisan ano oras suno sa DFA, handa sila sa pagbulig.
Nahibaluan nga base sa latest statement sang military spokesperson sang Israel, 700 ka Israelis kag dinosena ang na-kidnap sa adlaw sang pagpangibot kag pagpang-atake sang Hamas nga amo ang ginkabig sang militar nga “pinakamalala nga massacre sa mga sibilyan sa bilog nga maragtas sang pungsod.”
Sa gilayon nga pagtimalos sang Israel sa Gaza Strip kun sa diin kontrolado sang Hamas, 370 ka Palestinians ang patay kag 2,200 ang pilason. Sa sina nga numero, 300 ang napatay sa sulod lamang sang isa ka adlaw nga amo ang pinakamamatay nga adlaw para sa Palestinians sa Gaza halin sang 2008 ukon sa sulod sang 15 ka tuig. Lakip sa reported nga napatay sa pagbalos sang Israel paagi sa air strikes amo ang tatlo ka bulan nga kapid, ang ila iloy, kag ang tatlo pa ka mga iban nga kauturan. #
