Magapadala ang Estados Unidos sang Amerika sang barko-militar kag aircraft malapit sa Israel bilang kabahin sang suporta sa pungsod sa tunga sang pormal sini nga pag-deklarar sang gyera batok sa Palestine militant group nga Hamas.
Suno kay US Defense Secretary Lloyd Austin, magahatag ang Amerika sang dugang nga munitions kag fighter jets kag magahulag ang amo nga security assistance epektibo subong nga adlaw oras sa Amerika.
Photo Courtesy: Photo: Andrew Vaughan/The Canadian Press via AP
Ang ginmandu nga ipadala sa Eastern Mediterranean amo ang USS Gerald R. Ford Carrier Strike Group — pinakabag-o kag pinaka-moderno nga aircraft carrier sang US Navy — nga nagalakip sang carrier, guided missile cruiser kag apat ka guided missile destroyers.
Naghimo man sang tikang ang Amerika agud mapadala ang U.S. Air Force F-35, F-15, F-16, kag A-10 fighter aircraft squadrons sa rehiyon.
Antes sini, una na nga nagpasalig si U.S. President Joe Biden kay Israeli Prime Minister Benjamin Netanyahu nga magapadala ang US sang dugang nga assistance sa Israeli Defense Forces.
Nahibaluan nga base sa latest statement sang military spokesperson sang Israel, 700 ka Israelis kag dinosena ang na-kidnap sa adlaw sang pagpangibot kag pagpang-atake sang Hamas nga amo ang ginkabig sang militar nga “pinakamalala nga massacre sa mga sibilyan sa bilog nga maragtas sang pungsod.”
Sa gilayon nga pagtimalos sang Israel sa Gaza Strip kun sa diin kontrolado sang Hamas, 370 ka Palestinians ang patay kag 2,200 ang pilason. Sa sina nga numero, 300 ang napatay sa sulod lamang sang isa ka adlaw nga amo ang pinakamamatay nga adlaw para sa Palestinians sa Gaza halin sang 2008 ukon sa sulod sang 15 ka tuig.
Lakip sa reported nga napatay sa pagbalos sang Israel paagi sa air strikes amo ang tatlo ka bulan nga kapid, ang ila iloy, kag ang tatlo pa ka mga iban nga kauturan.
Tatlo man ka Americans ang ginapahayag nga nadala sa casualties.
Sa iya weekly address sa St. Peter’s Square, naghingyo naman si Pope Francis nga tapuson ang pagpang-atake kag kalakasan sa Israel bangud wala sang solbaron nga problema ang terorismo.
Nagpangamuyo man ang Santo Papa para sa mga biktima kag sa ila nga mga himata nga yara subong sa tunga-tunga sang posible matabo nga major kag bag-o nga gyera sa Middle East. #
