ILOILO CITY- Gin-athag sang pamunuan sang Resource Employees Association of City Hall (REACH) nga indi ihatag nga cash ang clothing allowance sang mga empleyado para sa subong nga tuig.
Sa interview sang Bombo Radyo kay Mr. Rudy Catahay, Presidente sang asosasyon, iya ginpahayag nga ang budget sa uniporme sang mga empleyado ang ginpain sa pagpangtakos nga ginpatigayon sa Freedom Grandstand sang Septyembre.
Suno kay Catahay, ang uniform allowance para sa masunod nga tuig amo ang iga-encash base man sa pahayag ni Mayor Jerry Treñas.
Sa subong,naglab-ot na sa halos 98% ka mga empleyado sang Iloilo city government ang nakapatakos na para sa ila nga uniforms matapos man ang pila ka bulan nga delay.
Dugang ni Catahay, posible subong nga semana makabalik diri sa siyudad ang mga personnel sang ila ginkontrata nga magtahi sang uniform halin sa Manila para sa mga wala pa nataksan bangud absent ukon naka- leave sadto.
Suno kay Catahay, gin- ayo niya nga kun mahimo nga matapos ang uniform sa Disyembre 2023 ukon Enero 2024.
Nahibaluan nga ini ang una nga kahigayunan nga nagpakontrata ang City Government para sa ila uniporme.
