ILOILO CITY- Ginapasiguro sang Antique Provincial Disaster Risk Reduction and Management Office kag Department of Public Works and Highways nga safe kag mapag-on ang Bailey bridge ukon ang temporaryo nga taytay sa Paliwan Bridge sa tion nga mag ulan-ulan ukon magtaas ang tubig sa amo nga lugar.
Sa interview sang Bombo Radyo kay Broderick Train, head sang Antique Provincial Disaster Risk Reduction and Management Office, iya ginpahayag nga ang bailey bridge ang sarang maagyan sang 4-wheeled light vehicles kag ang mga dalagkuan naman nga salakyan ang magaagi sa gihapon sa idalom ukon sa temporary access road sini.
Samtang, padayon naman ang pag- repair sa Paliwan Bridge nga nagakonekta sa Northern kag Southern Antique nga naguba sang naglaslas si bagyong Paeng sang tinalikdan nga tuig.
Madumdoman nga nagpadulong si Presidente Ferdinand “Bongbong” Marcos Jr., sa Antique sang nagligad lang nga semana kag iya man ginmanduan ang Department of Public Works and Highways Region VI nga dasigon ukon himuon nga prayoridad ang pagkay-o sang Paliwan bridge para sa mas mahapos kag safe nga alagyan padulong sa iban nga banwa sa Antique.
