Milagro nga nakaluwas sa katalagman ang kapid nga lapsag matapos nadala sa massacre ang ila iloy kag amay sang nagsalakay ang Hamas militants sa Israel.
Natabo ang brutal nga pagpamatay sa Kfar Aza kibbutz nga isa ka komunidad nga malapit lamang sa Gaza Strip nga teritoryo sang militante nga grupo.
Suno sa Israeli Embassy sa France, lakip sa mga napatay sang Sabado amo ang mag-asawa nga sanday Itai kag Hadar Berdichevsky, pareho nga 30 anyos.
Photo: Daily Mail UK
Apang dugang sang embahada, antes pa man nabawian sang kabuhi ang mag-asawa, nahingagaw nila luwas ang ila kapid nga anak nga naga-edad sang 10 ka bulan.
Ginpahayag nga antes nagsulod ang mga terorista sa ila puluy-an sa Kfar Aza, natago sang mag-asawa ang kapid kag nagpabilin ang mga lapsag nga hilway sa katalagman sa masunod nga 14 ka oras antes nag-abot ang emergency services.
Ginpahayag nga masobra 1,200 ka Israelis ang napatay kag masobra 3,000 ang nasamaran sang ginlunsar sang Hamas ang atake sang Sabado. Sa Gaza naman — kun sa diin kabataan ang halos katunga sang Palestinians nga nagapuyo — masobra 1,200 ka tawo ang patay lakip ang ginatos ka mga bata sang nagtimalos na ang Israeli military. #
