Nagapangatubang sang sampaw-sampaw nga kaso ang isa ka 71-anyos nga lalaki sa Estados Unidos sang Amerika matapos sini brutal nga ginbuno sang masobra 20 ka beses ang isa ka bata nga Muslim bangud sa ila nga relihiyon kag ginpahayag man nga epekto sang gyera sa tunga sang Israel kag Hamas militants.
Ang Palestinian-American nga biktima amo si Wadea Al-Fayoume, 6, nga ginbuno sang suspek sang 26 ka beses gamit ang military-style nga kutsilyo.
Photo Courtesy: Council of American Islamic Relations
Masobra 10 man ang pilas sang iya 32-anyos nga iloy nga si Hanaan Shahin apang ginalauman pa nga makaluwas gikan sa amo nga brutal nga krimen.
Ang suspek suno sa Will County Sheriff’s Office amo mismo ang landlord sang mga biktima nga si Joseph M. Czuba, residente sang Plainfield Township sa southwest sang Chicago, Illinois.
Suno pa sa news release sang Sheriff’s Office, ginkasuhan si Czuba sang first-degree murder, attempted first-degree murder, two counts sang hate crime kag aggravated battery with a deadly weapon.
Wala pa ini sang ginhatag nga statement sa otoridad apang pahayag sang opisina, “Detectives were able to determine that both victims in this brutal attack were targeted by the suspect due to them being Muslim and the on-going Middle Eastern conflict involving Hamas and the Israelis.”
Nahibaluan nga naka-responde ang mga pulis sang nagtawag ang isa ka babayi sa 911 nga naga-report nga gina-atake siya sang iya nga landlord.
Sang nag-abot ang deputies, nakit-an si Czuba nga nagapungko lamang sa duta malapit sa driveway.
Nasapwan naman ang mga biktima sa sulod sang kuwarto nga pareho nga nakaangkon sang patal nga mga pilas.
Natugyan na ang suspek sa Will County Adult Detention Facility kun sa diin hulaton sini ang iya una nga court appearance.
“As we await the official investigation of the local authorities, what we can confirm at the moment is that we have a murdered child in his own home, a six-year-old who had just celebrated his birthday a couple of weeks ago, and a mother lying in the hospital in serious condition, both stabbed over a dozen times,” pahayag sang Council of American Islamic Relations-Chigaco Chapter, isa ka Muslim civil rights and advocacy group. #
