ILOILO CITY – Suportado sang coalition sang party-list groups sa House of Representatives si Speaker Martin Romualdez sa tunga sang kritisismo bangud sa discretionary funds.
Suno sa 57-member Party-list Coalition Foundation, Inc., gina-abi-abi nila ang pagdepensa ni Romualdez sa institusyon nga nagpasiguro sang rightful representation sang 300 ka mga mamalidha bilang mandato sang Constitution.
Ang statement ang ginpirmahan nanday Ako Bicol Rep. Elizaldy Co, ang chairman sang House Committee on Appropriations kag presidente sang coalition; BHW Rep. Angelica Natasha Co; GP Rep. Jose Gay Padiernos; TGP Rep. Jose Teves Jr.; kag TUCP Rep. Raymund Democrito Mendoza.
Pahayag sang grupo, lakip sa mga dalayawon nga tikang sang House Speaker amo ang pagsaylo sang confidential funds nagikan sa pila ka mga civilian agencies agud nga mapabaskog ang proteksyon sa West Philippine Sea.
Sang nagligad nga semana, gindepensahan ni Duterte ang ginaduso nga confidential funds sang iya anak nga si Vice President Sara Duterte sa 2024 budget.
Gin-alegar man niya nga ginatulon ni Romualdez ang pork barrel funds nga dapat nga talupangdon sang Commission on Audit.
Nagdepensa naman si House secretary general Reginald Velasco nga ang public fund expenditures ang nagasunod sa pagsulundan sang Commission on Audit kag sa pinakaulihi nga finding, wala sang disallowances, notice of suspension kag notice of charge ang Kamara.
Nahibaluan nga gin-realign sang Kamara ang ginaduso nga confidential funds sang Office of the Vice President, Department of Education, kag duha pa ka iban nga departamento, padulong sa mga ahensya nga in charge sa pagpasiguro sang national security.
Ini ang ginalakipan sang mga masunod:
P300 million sa National Intelligence Coordinating Agency;
P100 million sa National Security Council;
P200 million sa Philippine Coast Guard para sa intelligence activities and ammunition; kag
P381.8 million sa Department of Transportation para sa airport development/expansion sang Pag-asa Island Airport
