ILOILO CITY- Gin-athag sang Securities and Exchange Commission nga wala sang permit ang Upsolution Online Shop International para magpatigayon sang investment.
Ini matapos ginpa- Bombo sang mga investors ang Upsolution Online Shop International nga nahamtang sa Aldeguer St. Iloilo City matapos natukiban nga naka-padlock ang opisina kag wala sang empleyado nga nag-atubang sa ila apisar nga ginpasalig sila nga mahimo na sila nga maka-cash out sang ila kwarta nga gin- invest.
Sa interview sang Bombo Radyo kay Atty. Ma. Cristina T. Montelibano, Director sang Securities and Exchange Commission- Visayas, iya ginpahayag nga trading ang purpose sang rehistro sang Upsolution kag indi para sa investment.
Suno kay Montelibano, ini ang naka-rehistro para lang sa mga food supplements kag iban nga health products nga may authorized capital nga P500,000.
Paathag ni Montelibano nga nasaad sa rehistro nga indi sila posible maka-engage sa investment- taking halin sa publiko kag wala ginapahanugutan nga maghimo sang investment contact sa tunga sang ila grupo kag sa publiko kag kinahanglan pa sang secondary license nga i-issue sang Securities and Exchange Commission para nga mahatagan kahigayunan nga mag-operate sa investment ang nasambit nga grupo.
Nahibaluan nga nagpagguwa ang Securities and Exchange Commission sang advisory batok sa Upsolution Online Shop International nga dapat indi mag-invest ang mga tawo sa nasambit nga stockholder group.
Nagpagguwa man ang komisyon sang show cause order paagi sang nagligad nga semana kag ginbaton sa mga nagadumala sang investment group nga sang October 17 kun sa diin ginhatagan sila sang pulo ka adlaw nga magsabat sa alegasyon nga isa ka sahi sang scam ang ila operasyon.
