ILOILO CITY- Naglab-ot na sa kapin 30 ka mga indibidwal ang nagpabalhag sa Iloilo City Police Office bangud ginaalegar nga nabiktima sang ginapahayag nga investment scam sa syudad.
Ini matapos nagwangal ang mga investors sang Upsolution Online Shop International nga nahamtang sa Aldeguer St. Iloilo City sang natukiban nga naka-padlock ang opisina kag wala sang empleyado nga nag-atubang sa ila apisar nga ginpasalig sila nga mahimo na sila nga maka-cash out sang ila kwarta nga gin- invest.
Sa interview sang Bombo Radyo kay PCapt Roque Gimeno III, hepe sang Iloilo City Police Station 1, iya ginpahayag nga kalabanan sa mga complainant ang nag- invest sang indi magnubo sa P75,000 kada isa kag may yara man nga nag- invest sang P300,000.
Suno kay Gimeno, ang ginapangita sang mga complainants amo ang marketing head sang Upsolution Online Shop International nga si AKARAJ nga tumandok sang Sorsogon nga nangindulaan na kag indi na ma-contact.
Pahayag ni Gimeno, mahimo mahulog sa large scale ukon syndicated estafa ang kaso nga posible ipasaka sang mga complainants batok sa Upsolution Online Shop International.
Sa interview naman sang Bombo Radyo kay PCol Joeresty Coronica, director sang Iloilo City Police Office, nagpaandam ini sa mga pumuluyo nga indi gid mag-benturar sa pag-invest sang kwarta sa kaangay nga mga investment scheme nga may tuman ka dako nga return of investment.
Ang entity ang nagapromisa sa mga investors sang ginansya nga P6, 000 tubtob P204,000 pagkatapos sang 37 ka adlaw, depende sa ila investment.
