ILOILO CITY- Nagpasaka sang kaso sa Ombudsman ang isa ka kompaniya batok sa mga myembro sang Bids and Awards Committee sang Iloilo City District Engineering Office.
Ang kaso nga ginpasaka ang may kaangtanan sa nakumiter nga paglapas sa Republic Act 3019 ukon Anti- Graft and Corrupt Practices Act, kag Republic Act 9184 ukon Government Procurement Reform Act.
Ang mga respondents amo sanday Aflredo Hernandez, Fema Guadalope, Allan Salaver, kag Edward Joseph Sudario.
Sa interview sang Bombo Radyo kay Ethel Bayotas, tag- iya sang PAG BUILDERS nga nahamtang sa Hibao-an Norte,Mandurriao, iya ginpahayag nga sa ginpatigayon nga bidding para sa P1.3 million nga balor sang construction project sa I. Arroyo Elementary School sa Brgy. North Fundidor, Molo, Iloilo City, na-disqualify ang ila bid bangud sa non-compliance sa requirement sa diin wala gindeklarar ang mga on-going projects sang kompaniya.
Apang, suno kay Bayotas, natapos na ang tanan nga proyekto nga gin-identify sang Bids and Awards Committee.
Suno pa kay Bayotas, sa walo ka mga bidders, pito ang na-disqualify sa pareho lang nga rason.
Pahayag niya, ang ginhimo sang mga respondents ang nagapakita sang maathag nga partiality, bad faith kag gross inexcusable negligence kag may yara sang ginapaboran nga bidder ang amo nga opisina.
Sa pagkamatuod, dugang niya, sang ginpamangkot nila ang mga respondents kun ngaa nag-disqualify sila, ginpakitaan lang sila sang papel nga lapis lang ang nakasulat kag ginsugo sila nga kuhaan nalang sang letrato,sa baylo nga padal-an sila sang disqualification notice.
