ILOILO CITY – Matapos ang halos duha ka semana sang ginpahog kag gin-red tag ni anay presidente Rodrigo Duterte si ACT Teachers Partylist Representative France Castro, pormal na nga nagpasaka ang mamalidha sang criminal complaint batuk sa iya.
Grave threat ang ginpasaka nga kaso ni Castro batuk sa anay presidente sa Office of the City Prosecutor sa Quezon City.
Siya ang gin-represent sang mga volunteer lawyers nagikan sa Movement Against Disinformation.
Suno kay Atty. Tony La Viña, ini ang una nga tion nga ginpasakaan sang kaso ang anay presidente.
Bangud nga ang iya termino ang nagtakup sang nagligad nga tuig, si Duterte ang indi na mahimo nga mag-avail sang immunity from suit.
Matandaan nga gin-angut ni Duterte si Castro sa kumunista nga grupo nga wala sang basehan.
Samtang nagawangal ang anay presidente bangud sa pagbasura sang House of Representatives sa confidential fund requests sang Office of the Vice President kag sang Department of Education nga lunsay ginapamunuan sang iya anak nga si Sara Duterte, ginpahayag niya nga si Castro ang dapat nga unahon nga patyon.
