Nagpasugot ang Israel nga ipaiway anay ang natalana sini nga invasion sa Gaza kasunod sang hingyo sang Estados Unidos sang Amerika.
Pahayag sa reports, lakip sa ginkonsiderar sang pwersa sang Israel amo ang pagpaninguha man nga mapadal-an sang humanitarian aid ang minilyon ka Palestinians sa sulod sang Gaza, kag ang diplomatic efforts agud nga hilwayon sang Hamas militants ang ila ginauyatan nga mga bihag lakip na ang mga tigulang kag foreigners.
Amir Cohen/Reuters
Ang isa pa sa ginalantaw nga makahalangawa nga bahin amo ang pamahog sa kabuhi sang tropa sang Estados Unidos. Ini bangud nagapati ang US military kag ang iban pa nga mga opisyal nga ang ila pwersa ang target sang iban nga militante nga grupo kun maglunsar na ang Israel sang ground invasion sa Palestinian territory.
Bangud sini, ginadali-dali subong sang Amerika ang pag-deploy sang air defense systems lakip na para sa tropa sini nga naga-serbe sa ila base sa Iraq, Jordan, Kuwait, Jordan, Saudi Arabia, Syria kag sa United Arab Emirates.
Una na nga ginpahayag nga nag-abiso ang Washington sa Israel nga i-delay anay ang pagpatigayon sang ground assault sa Gaza Strip. Nakahibalo man ang Qatar (broker sa Palestinian militants) sa sini nga mga diskusyon samtang nga ginatinguhaan man sini nga mahilway ang dugang nga mga bihag.
Sang nagligad nga semana, una na nga nagguwa ang reports nga nagaplano ang Pentagon nga magpadala sang duha ka Iron Dome missile defense systems sa Israel agud mabuligan ini nga protektahan ang kaugalingon sa inbound missiles.
Gin-alegar man nga may plano man nga magpadala sang Terminal High Altitude Area Defense (THAAD) system kag dugang nga Patriot air defense missile system battalions sa Middle East. #
